FILEMON Pol re Filemon rene basrasem siglow.

Kiyi late tuma.

Gwor siglow Pol re basrasen Filemon rene newopitim. Pol re Romri ake yaperke temenem, re gwor siglow basrasem.

Filemon re Kolosi kwomri God rene omuteke habobem tame. Re kel wurkene tame. Reri yaku bop nenbem tame, Onesimus, re Filemon reri kel bisi an amen yim. Yuri re Pol rene lasyim, re Jisas rene omuteke habobem tame tem. Opkap, Pol re gwor siglow basrasen Filemon rene op wem. Filemon, ne Onesimus rene sene poten pap yewote. Kiyi re tame yaper temenem, sene re Jisas rene omuteke habobo. Opkap, ne rene potte. Re neri mase tem. Pol re etop basrasem.

Philemon

Filemon reri yaku bop nenbem tame re Filemon rene mesginen amen yim. Yuri re God rene omuteke habobem, Pol re rene Filemon rene werasen yim.

1An Pol, an Krais Jisas eterri tuma wesowbemke, rem anne ake yaperke wen wurem. Nemri mase Timoti rekene nes kemne siglow basrasbo. Filemon, ne nesesri tametiy yenbo, ne nesesri yaku nen tamesip mere. 2Nemri geisi, Apia etet, nemri mase Arkipus eterkene nes kepne gwor siglow kirkir basrasbo. Arkipus, nerenkene nem God eterri peiktame remkene naibo, opkap nem ei nai tamesip tetane. Neri akek wurbo Jisas rene omuteke habobo tatame etemne mere, nes remne gwor siglow kirkir basrasbo.

3Nes selbo, nemri Apiy Godkene Haneyen Jisas Kraiskene rep kemne pap meten kwobo labet. Rep kemne pap pultebet, kem pap yenbo temenbet.

Filemon re nenbem wule yenbo Pol re metekwasbem.

4Mase Filemon. An ari God rekene tuma namrebo wule an nene habon rene wese abo. 5An metem, ne Haneyen Jisas Krais rene omuteke habobo, ne God reri tatame aboyei remne pap yewobo, eker an God rene wese abo. 6An God rene gwopkap wemetbo. Nem Krais rene omuteke habobo tamesip, nem sin gerabo wulek nem Krais rekene bogtene wule heyar sanete. Krais re nemne yenbowai nenbokap, nem etop heyar sanete. 7Mase yenbo, ne God reri tatame remne pap yewobo, rem aboyei rem pap yenbo tebem. An etop metem, an okbop ten pap yenbo tem.

Filemon re Onesimus rene reri masekap sene potte.

8Krais eterke an neri lake, eker an mol pan teten nene kebese yak rin nene yaku wuri nente wete. 9An nene etop be nente. Yehow. Pap yewobo wule et nesne keikeretene, eker an er yaku nene elen me wemette. Ekeya. An Pol, an ker tame. Krais Jisas eterri yakuk an ake yaperke tetane. 10An nene wemetbo, Onesimus rene pap mette. Krais eterke re areri yen. An ake yaperke temenem, re anne lasyan an rene kwobo lam, re God rene omuteke habom. Opkap, an webo, re ariri yenkap tetane. 11Kiyi re neri yaku welepe be nenbem tame. Re nene kwobo be labem. Sene re nesne kwobo late.

12Rene an nene werasen yibo. Ari meseke mogul et eterkene yibo. 13An God Reri Tuma Yenbo wesowbem, rem anne ake yaperke wen wurem. Eker re arenkene temente an etop selbo. Opkap re neri emi poten re anne kwobo late. 14Ne anne kwobo late, an nene yak rite muwebo. Ne neri wuribai nente, an etop selbo. Ne kirkir be wete, an rene be keikerete.

15An op habobo. Onesimus re nene mesegenen keraket tem, eker re nene lasyite, re nerenkene somsom temente. 16Gwopte he yaku bop nenbo tamewou bo. Krais eterke re nemri meseke mogul mase. An rene kenakem habobo. Neren ne etop habote. Re neri yaku bop nen tame, re neri God rene habobo mase mere. Opkap ne rene kenakem kirkir habote.

17Ne anne op habobo, an neri yaku nen tamesip. Eker an nene lasyan ne anne pap yewobokap, ne Onesimus rene etopkap pap yewote. 18Kap, kiyi re nene yaper nenem, o re neri kel potem, ne anne wesowte, an nene kel sein newote. 19An Pol, an ari letke op basrasbo. Aren, an nene sein newote tetane. Ne habote. Kiyi an nene God Reri Tuma nene wesowbem, ne Apiy rene omuteke habobem. Op nenem, an nene be wete, ne anne wos sein newote. Yehow. 20Ari mase, setate. An nene wemetye wos ne Krais eterri sigke nente. Krais eterke nes lake mase. Ne op nente, an pap kwuye meten okbop tete.

21An gwor siglow nene basrasbo, an omuteke habobo, an nene webokap, ne etop nente tetane. Ne degerbokene nente. 22Etop tete, ne anne tukna emi heyarte. An habobo, God re keremri wemetbokap re etop meten nente, re anne werasen an kemne lasyate.

Pol reri sukuw rem Filemon rene pir webo.

23Epafras re Krais Jisas reri tuma wesowbem, re arenkene ake yaperke tetane. Re nene pir webo. 24Ari yaku nen tamesip, Mak, Aristarkus, Demas, Luk etem mere, rem nene pir webo.

25Haneyen Jisas Krais re kemne pap meten kwobo labet.